‘N LEWE BUITE SUID-AFRIKA

vlag

Na aanleiding van twee Engelse artikels (ja, hierdie Vrystater kan darem “the language” so effens uitmaak) hier in ons koerant, het ek gedink om my eie Afrikaanse weergawe te doen en my stempel daarop te plaas. Die artikels in The South African hier in Engeland, was onder die opskrifte, “Five hard truths I’m learning living overseas” en “Five culture shocks every South African experiences when living in the UK”.

Die skrywer van eersgenoemde artikel, begin deur te sê dat “Living life between two worlds leads to some learning curves and hard, hard truths”.

Om in ‘n oorsese land huis op te sit, is ‘n avontuur – om die minste te sê. Jou lewe is gevul met ontdekkings, persoonlike groei en opwindende besluite oor jou en jou gesin se lewens, Dit is egter ook met eensaamheid en verwarring gelaai. En baie, baie deursettingsvermoë en aanpasbaarheid.

Verlangdae so saam met die gemis van bekende geure, klanke en die Afrika-son op jou vel dwing jou dikwels om hardop ‘n gesprek met jouself te hê. Dan vertel jy vir jouself dat elke negatiewe gevoel nie noodwendig die teken is dat jy moet oppak en terug huis toe gaan nie. Daardie gevoelens raak maar deel van die avontuur.

  1. JY LEER OM DIE LEWE EN DIE WÊRELD SONDER HULP TE NAVIGEER

Jou hele ondersteuningraamwerk het in Suid-Afrika agtergebly. Hier is nie ‘n ouma of gawe buurvrou om na die kinders te kyk as julle die aand wil uitgaan nie. Jonas en Mieta is ook by die huis – hier werk jy self in die tuin, was die kar en doen al die huiswerk. By ons is Saterdagaande voor die TV strykaand. Saans loop jy alleen in die reën van die stasie af huis toe en wens tog so om gou vir ‘n koffietjie by ‘n broer of suster of ou skoolvriend in te glip om te kla of om vreugdes te deel. Later aanvaar jy dat dit nie moontlik is nie en nog later raak jy gewoond daaraan.

  1. JY BESEF DAT JY NIE ‘N GESKIEDENIS HIER HET NIE

My jongste het dit lank gelede goed gestel. Hy het sy lewe in Suid-Afrika as ‘n lyn gesien. Toe stop daardie lyn en begin hy noodgedwonge ‘n nuwe lyn in Engeland. Wanneer hy weer terug Suid-Afrika toe gaan, sal hy weer ‘n nuwe lyn moet begin, want daar het teveel op sy Engelse lyn gebeur om die twee Suid-Afrikaanse lyne sommer weer te kan verbind.  Daar gaan dus ‘n gaping tussen die twee lyne wees. Aan die ander kant het sy Engelse lyn sommer so in die lug ontspring. Daar is ‘n groot deel van sy lewe wat nie op hierdie lyn verteenwoordig word nie. Toe die ander seuns ‘n oupa-en oumadag by die skool gehad het, was sy grootouers baie myle vêr. Hy het ook nie in dieselfde omgewing as sy Engelse skoolmaats tot hier gekom nie. Sy hele verwysingsraamwerk was anders. En dit gaan weer anders wees as hy terug Suid-Afrika toe gaan.

Ons mis die familietroues en neefs se mondigwording. Ons kan nie lewenslange vriende se begrafnis bywoon nie. ‘n Vinnige braai saam met ou Swaer bly ‘n wens.

Maar jy kry ander dinge om hierdie leemtes te vul en ‘n pak Oumabeskuit of ‘n braai saam met mede-verlangharte kry dieper betekenis.

  1. AANVAAR DAT MENSE IN EN UIT JOU LEWE GLIP

Jy gaan heel waarskynlik kontak met baie van jou vriende verloor. Aanvaar dit, dit is die verloop van die lewe al het jy in Suid-Afrika gebly. Gelukkig vir Skype en Facebook kan mense steeds deel van jou lewe bly. Ek het juis deur die sosiale media met ou skoolvriende bande opgetel met wie ek waarskynlik nooit kontak sou gemaak het as ek in Suid-Afrika gebly het nie. Jou verlanghart dryf jou dikwels om te kyk en te wil weet wat in jou ou buurt aangaan.

  1. TYD SAAM MET GELIEFDES IS NOOIT GENOEG NIE

Of jy nou huis toe gaan vir die Kersvakansie en of familie en vriende vir jou kom kuier, die tyd vlieg gou verby en baie vinnig wens jy dat jy dit weer oor kan hê. Daar gaan beslis blydkskap-trane van hereniging wees, maar wees ook voorbereid op die gewone familietwispunte. En die opmerkings (wat in baie gevalle niks anders as verskuilde afguns is nie) – “Julle het mos landuit gevlug”, of “Julle los ons toe mos om die probleme uit te sorteer”.

Jy besef gou hoe baie dinge maar nog is soos jy dit onthou, nie veel het verander nie. Tyd het in baie opsigte stil gaan staan. Maar dan let jy die subtiele veranderings op. En die grotes. Kleuters word tieners. Tieners staan nou op trou. Jou ma loop krommer. Die tuine in die buurt van jou kinderjare lyk nou verwaarloos.

En dan besef jy hoe die tyd verbygaan het en die lewe nie stilstaan nie. En hoe baie veranderings en aanpassings daar in jou eie lewe was.

  1. ONTHOU JOU REDE

Elkeen van ons het ‘n rede hoekom ons nie in Suid-Afrika woon nie. Mag dit nooit wees om van probleme af weg te kom nie, want dit gebeur nooit! Probleme is oral – die aard daarvan verskil slegs.

Daar kom dae wanneer verlange plek maak vir ander emosies. Skuldgevoelens is dalk een van die grootstes, veral wanneer ek die hunkering in my ma se stem hoor om die kinders te sien, te hoor, te druk. Ook wanneer ek sien hoe uitbundig die kinders saamkuier wanneer ons in Suid-Afrika gaan kuier. Dit is sulke tye wanneer ek myself moet herinner aan die rede vir ons opofferings. Ja, elkeen het ‘n rede. Ons wou ons kinders se horisonne verbreed en hulle ‘n beter kans gee om (met twee paspoorte) ‘n groter verskeidenheid geleenthede te hê.

passports-original

Vandag pluk ons reeds die vrugte van ons opofferings, maar daar sal altyd die “gewonder” wees – wonder hoe sou dit gewees het as ons in Suid-Afrika gebly het. Met twee paspoorte kan ons darem enige tyd weer huis toe gaan. ‘n Naweekwegbreek na ‘n Frankryk of Holland of enige Europese land is darem ook soveel makliker sonder die rompslomp van visum-aansoeke. Selfs lande soos Amerika en Australie hou die hekke vir jou oop wanneer jy die rooi paspoort waai.

In Engeland moes ons vinnig ‘n paar kultuurskokke oorbrug. Ek noem vinnig die vyf wat in die tweede artikel van “The South African” beskryf is.

  1. RUIMTE IS ‘N LUUKSE

Dit is ‘n groot pluspunt wanneer jy parkeerplek vir jou kar in die oprit het. Baie karre staan snags op straat en saans en oor naweke kan dit tot gevegte lei vir ‘n gesogte parkeerplek. Die huise is gemiddeld baie kleiner as in Suid-Afrika en die tuine (gelukkig ook maar, so sonder ‘n Jonas) is nie veel groter as ‘n blombedding in Suid-Afrika nie. Jou bestuursvernuf word tot die uiterste toe beproef in die nou strate waar daar heel dikwels net vir een kar plek is in ‘n tweerigtingstraat. In die platteland waar ons woon, kan ons darem bene rek (maar die huise is steeds kleiner).

  1. KRY SUID-AFRIKA ‘N BIETJIE UIT JOU KOP

Hoe swaar ook al, jy moet jou Suid-Afrikaansheid soms opsy skuif. Jy wil outomaties vergelykings tref met alles in Suid-Afrika totdat jy almal begin irriteer met “..in Suid-Afrika doen ons…”. Ons Afrikaners is ‘n trotse lot en dit is soms maar moeilik om te weet wanneer die Britse manier ingespan moet word en of jy maar moet vasklou aan jou eie gewoontetjies. Sodra jy die regte mengsel van die twee kan baasraak, begin jy die oorhand oor die situasie kry. Kersfees in die winter werk nog steeds nie vir my nie.

  1. SUID-AFRIKAANSE TYD IS UIT

Niemand hier verstaan “nou-nou” nie. Jou tydsbestuurvernuf word tot die uiterste toe getoets, veral wanneer jy drie verskillende treine werk toe vat. Normaalweg loop die openbare vervoer soos ‘n duur horlosie, maar soms kan ‘n stok in die spreekwoordelike wiele ‘n dag sleg omkrap.

  1. MIN MENSE HIER ROND KNOOP GESELSIES AAN

Ons Suid-Afrikaners hou nogal daarvan om te klets. Behalwe vir die ouer (eensame?) garde, doen die Engelse dit nie. Om ‘n gesprek met ‘n vreemdeling aan te knoop, is so stram soos flinke diens op ‘n Vrydagmiddag in ‘n Kroonstadse munisipale kantoor. Veral as jy met ‘n aksent praat.

  1. JY’S SUID-AFRIKAANS – EN ANDERS

In openbare plekke mag jy dalk sukkel om ‘n gesprek aan die gang te kry, maar by sosiale geleenthede vind jy jouself heel dikwels omring van mense wat graag luister hoe jy ‘n leeu uit jou sitkamer in Suid-Afrika verdryf het en (na al die jare) steeds verstom is dat ons toilette in Suid-Afrika het. (Tell me, where is South Africa? Duh, jy moet ‘n clue sien in South en in Africa!). Onthou, jy kom van ‘n ver plek af en mense wil weet hoe jy selfs tot in Engeland kon kom. As die plaaslike Suid-Afrika-kenner, voel jy verplig om die mense in te lig oor jou geliefde land.

En selfs al was jy nie eers so baie lief vir jou land nie, besef jy vinnig, na al die stories wat jy vertel, hoe jy die land – jou ware tuiste – mis.

Advertisements

16 thoughts on “‘N LEWE BUITE SUID-AFRIKA

  1. Jou ‘verwerking’ het ‘n puik resultaat gelewer, André! Soos jy nou al weet, mis ek Suid-Afrika nie, maar wel die mense wat ek liefhet. Dan was ek ook nooit lief vir die warm son nie. Maar, soos jy tereg sê, is daar sekere dinge wat eg Suid-Afrikaans is, wat jy nie kan verduidelik nie. Dis gewoon in die lug wat jy inadem.

  2. Stem saam met meeste dinge wat genoem word in die artikel. ‘n Ander ding om aan gewond te raak is die kompetisie vir werk en ‘n gepaargaande glas plafon in die kantoor as jy ‘n buitelander is hier in die VSA. Amerika blyk keelvol te wees en is glad nie meer so immigrant vriendelik nie.

    • Dit is interessant. Is dit werklik so in die res van die VSA? Ek kan nie sê dat ek dit so in die UK beleef nie. Werk is oor die algemeen nie baie volop nie, ongeag nasionaliteit. Maar ek moet dadelik byvoeg dat die instroming van “migrants” van die Midde-Ooste, Asië en Oos-Europa begin ook sy tol te eis hier en in Europa. Daar is toenemend minder verdraagsaamheid teenoor immigrante. Dankie vir jou kommentaar.

  3. Andre, jou artikel gelees en sal baie dit heel waarskynlik moeilik verstaan indien hulle nog nie buite die grense van hul comfort zone, SA gewoon en gewerk het nie. Ek was al n paar keer uit SA maar waar ek die meeste begrip opgetel het, was my tyd in Zambia en Nigeria. Mens kry Africa en South Africa, twee verskillede werelde. Ons het baie famiie en kennisse wat orals oorsee woon en is hul ondervinding en terugverlang maar basies dieselfde. Maar in lande wat onafhanklikeid en selfbestuur jare gelede op hulself geneem het is die ‘oorlewings- en aanvaardings faktor baie erger. Ek wil nie te veel uitbrei daaroor nie maar as mens dit nie self beleef nie verstaan die meeste mense ook nie waarvan ek praat nie.

    Jy ry vanoggend na jou werk en ‘n dooie persoon le op die “hi-way”. Jy gaan vanaand terug en die persoon le steeds op die pad – en voertuie het daaroor gery ook (daar is n rede daarvoor) – dit laat mens erg wonder waar beskawing begin en eindig en waar almal op daardie skaal le. Alhoewel ek nie regtig n patriot is nie en SA sal verruil vir sekere ander dele in die wereld, bly jou geboorteland altyd ‘n hegte deel van ‘n persoon.

    Sterke vir julle almal!

    • Ja ou maat. Ek glo dat baie mense glo dat al hul probleme iets van die verlede is sodra hulle buite SA se grense trek. Ek het, soos baie van ons SA vriende hier, gevind dat jy wel sommige van jou probleme in SA agterlaat, maar dat jy jou trompop in nuwe uitdagings (soos ek verkies om dit te noem) vasloop. En jy is reg, as die Afrikabloed in jou are is, kan niks dit daar uitspoel nie. Ek sal graag meer van jou ervaring in Zambië en Kenia wil hoor. Maar jy skuld my buitendien ‘n lekker gesels-e-pos om my vrae te beantwoord. So goed om van jou te hoor!

  4. Ek dink nie dit sal meer vir my moeilik wees om Suid-Afrika te verlaat nie, maar dis ongelukkig te laat vir my. Ek sal egter nooit in ‘n ander land aard waar dit altyd koud of nat is nie – dit sal my na of drank of moord dryf 🙂

    • Ek wil jou so graag op ‘n naam noem, ‘n regte naam, want met jou kan ek ‘n pad loop. Ek hou van jou skryfsels en die wyse waarop jy dink en jou jouself uitdruk. Jy moes ook nou al afgelei het dat dit net my lyf is wat in die buiteland is – my hart is nog in SA. In SA het mistroostige, reenerige dae in my gemoed kom kruip en ek het gedink dat ek permanent morbied in Engeland sal wees. Ek is mal oor die son, regte-egte Afrikason met blou lug en wit wolke. My mistroostige dae hier kan egter nie aan die weer toegeskryf word nie – snaak genoeg. Die weer het nie werklik so ‘n groot effek op my nie. Wat wel soms pla, is die kort dae in die winter wanneer dit sommer hier van 4-uur af donker word.

  5. My hart klop maar benoud soos ek hier lees. Ons bly in woonstel op my dogter hulle se erf. Haar twee jong seuns ontwikkel hier voor my oë. Nou praat hulle van Amerika toe immigreer. Dit gaan nie maklik wees om hulle te sien gaan nie, wetend dat jy hulle baie min gaan sien?

    • Ek weet nie vir wie dit die moeilikste is nie – vir diegene wat agterbly of hulle wat trek? My probleem is verder dat ek nooit “afsluiting” gehad het nie. Nadat ek my werk verloor het (toe Saambou tot ‘n val gekom het) het ons besluit om sommer as ‘n familie-avontuur en wonde lek vir so ‘n jaar of so die buiteland te gaan verken. Ons het dus nooit werklik besluit om te emigreer nie. Daai “jaar of so” het egter nou baaaie lank uitgerek. Ons het niks behalwe die twee motors in SA verkoop nie. Ons laaste hond is voorverlede jaar dood. Ons families het intussen maar ophou vra wanneer ons dan terugkom. Ek weet self nie.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s