Ek staan en bewonder so ‘n lang, regaf rok. Daar is seker ʼn slim naam vir die kleur – roomkleur of pêrelwolk of sampioendou – ek sal nou nie weet nie. Vir my is hy so witterig met groot pastelkleur blomme op. Dis ook nou nie aldag dat ʼn rok my so vasvang nie, maar nou moet ek toegee dat dit dalk meer die lyf in die rok is wat my aandag het.
Sy eet ʼn roomys, ingedagte terwyl sy verby die stalletjies drentel – in my rigting. Met elke beweging kry die soepel materiaal lewe, dit vloei en beweeg en vou om haar lyf.
My oë is vasgenael op haar. Die wind dans guitig deur haar donker hare en gooi die songlans in klomp rigtings.
Elegant, vroulik, lank nie meer ʼn tiener nie. Sy loop nie, sy sweef. Netjiese voete in sulke bruinerige sandale. Haar hande is fyn, delikaat met gemanikuurde naels. Haar grimering smaakvol en subtiel.
Sy kom agter dat ek vir haar kyk. Die blou van haar oë gryp my blik aan en smelt die afstand tussen ons – ʼn enkele verposing met ʼn ewigheidsimpak. Haar rooi lippe vorm klanklose woorde en sprei ʼn glimlag wat tsunami’s kan stuit. Sy sweef tot teenaan my. Haar warmte en die sagtheid van die blommateriaal beur tot in die dieptes van my lyf en jaag my hormone holderstebolder. Ek kry ʼn happie van haar roomys, haar lippe raak sag aan myne. Ons hande vleg ineen en, gehul in haar sagte parfuumwolk, drentel ons saam verder – met genoegdoening en die wete…
Sy is myne – vandag al vir drie-en-dertig jaar.
Venisië
BILTONG & POT- ROAST 
Dis pragtig geskryf en vorm n mooi prentjie in my gedagte.
Jy is so gaaf, baie dankie.
Pragtig beskryf mater. Baie geluk !
Dankie my ou vriend, Jy weet mos… (want jy ken dit ook).
Aha so lekker romanities! Dapper vrou wat dit so lank met jou uitgehou het?
Dankie! (Maar oeee… wat weet jy wat sy nie weet nie?)
Ek maak mos maar so paar gevolgtrekkings
Baie skerp
Dankie!
Goeie beskruiwing. Geluk, dit is n lang tyd – mag daar nog vele wees!
Dankie! Dit voel soos annerdag toe ons voor die kansel daar in Bloemfontein se Klipkerk gestaan het.
Nogals daar… ek ken daai kerk.
Nogal net vandag gedink dat ek nog ietsie oor daai kerk (en die woonstelle oorkant) wil skryf. Het jy enige verbintenis met die Klipkerk?
Baie geluk. Mag julle altyd gelukkig saamwees…dit vat deursettingsvermoe en waagmoed om so lank gelukkig te bly. Maar dit klink of julle die resep het.
Dankie Grassaadjie. Is daar ‘n resep? Ek glo daar is drie bestanddele nodig vir ‘n gelukkige huwelik – drie goed wat selfs belangriker as liefde is (liefde kom dan sommer vanself): vertroue, bedagsaamheid en ruimte.